Novedaes CURSU 09-10

Dempués de les vacaciones de branu tamos ya dende fai unos diis trabayando na programación del cursu 09-10.

Como novedaes más destacables tenemos una nueva especialida qu'aunque ta más rellacioná cola escena que colo musical, pensamos ye interesante por tar rellacioná cola canción narrativa y la llingua asturiana y sobre todo por non existir n'Asturies nengún sitiu onde se imparta. Les clases con Carlos Alba popular pol so personaxe de "Cellero" ta claro ya que tan dedicaes a los MONOLOGOS.

Per otru lláu tenemos nuevu profesor pal BAILLE ASTURIANO, Sergio Velasco de la Andecha Folclor d'Uvieu al que tamos ya agradecios poles ganes con que garra esta tarea, na que de xuru tendrá bonos resultaos.

Otra novedad ye l'ampliación d'horarios al Centru de la Cultura Asturiana en Llángreu "Casa de los Alberti" na qu'estableceremos parte de les nueses actividaes rellacionaes cola llingua asturiana como la nueva de Monologistas con Carlos Alba o la de Tonada con Anabel Santiago. Dende equi gracies fonderes a l'Ayuntamientu de Llangréu y a los reponsables del Centru pola so collaboración.

A lo llargo d'esta selmana espublizaremos más información de la ufieta pa esti cursu, de toes esti sábadu saldrá na Nueva España, edición de les Cuenques, tola información.

De momentu cualesquier consulta o reserva ya se puede tramitar dende'l 985 67 71 13.